فلسفة حمار
عـــــــــــــــــــــــــــجبي عليك يا ابن آدم يا أبو أكبر دار
بتقوّم الدنيا و متقعدهاش لما يقولولك يا حــــــــمار
إيه يعني اسـمي هوه شتيمة و لا جنسي شيء عـار!!!
خلقني ربي زي أما خلقك و محدش كان بايدوا إختيار
د أنا مهما زاد الحمل فوقي بأصبر على أي مشــــوار
لا فيوم بأرفع عيني على جارتي و بصون أي جــــار
و لا فيوم ببص على رزق غيري و أطقّ منه و أغار
و لا مهر بأدفع لحمارتي فلوس و لا خاتم و لا سوار
و لا شقة بأقعد سنين أجمع فحقها و لا أجهز ولا دوار
و لا مراتي حامل و بتتوحم عاوزة حالا شوية كافيار
و لا بنت بتخرج عن طوعي و تجيب لي كلام وعــار
و لا ابن يبوظ و يدمن و يهلوس و يوقع و ينهار
عــــــايش فحالي و متهني ومريح بالي على إيه احتار
باكل و بشرب و أنهق و أبرطع ما فيش عندي أسـرار
و عندي ابن آدم بيخدمني بإخــــــلاص ليل و نهار
إذا جعت بيشتري برســــــــيمي و إن كانت الأسعار نار
و إذا عييت بيعالجني ويقعد يدعي يا رب يا ستار
ده الإنسان خادم أمين ليا من غير مرتب أو حتى أيجار
عرفت يا بن آدم مين فينا لو اســــمي شتيمة طلع حمار
